醜小鴨愛自遊

(Day 6 - 高雄、老店興隆居、燒餅早餐、崗山之眼、夢時代、劉家酸白菜火鍋、大魯閣草衙道購物中心、果子狸水果店、高雄機場、香港)

07:00 早晨Day 6
今日係南台灣之旅最後一日，我一早約咗有興趣想去試吓台灣傳統早餐嘅團友喺酒店門口等，然後行黎呢間興隆居老店，所以6:30am就醒咗！

老店興隆居 (康橋中正館步行約7分鐘)
地址：高雄市前金區六合二路186號電話：07-2616787
營業時間：上午3:00-上午11:30 (週一公休)
官網： http://www.xinglongju.com/welcome.html

07:08 堂食外賣都係排同一條排，我哋排燒餅區啦！當時6、7個人排緊隊，唔算係好多人，除咗湯包和燒餅，其他嘢可以喺前面就咁叫俾錢就得！

兩相好：燒餅+1選項；
三代同堂：燒餅+2選項；
事事如意：燒餅+3選項

07:15 哈哈！竟然大家都搵到位坐，即係當時堂食唔算非常多人，估唔到都有成8個團友跟我黎吃早餐

07:16 我叫三代同堂：燒餅+油條+蛋，想叫店員幫忙將燒餅一開二，佢話唔可以，好彩有團友有帶剪刀，所以大家就可以一分二啦！

燒餅都幾脆，ok好味，但味道真係不及台北阜杭豆漿，後者燒餅會有少少甜甜地，味道較優勝！

另外有團友有叫咸豆漿，但我一早已經有講呢間嘅咸豆漿麻麻，要試就去台北嘅阜杭豆漿吃，真係好味好多！

叫左杯凍甜豆漿，亦有無糖有供選擇

07:32 走既時候就有好多人排隊啦！

07:40 經過台灣版六合彩「大樂透」，大家都話不如夾錢買一張玩下！因為好似有好多種，我又唔識，所以就問店員，邊種奬金最多，佢就話威力透，有三億幾台幣獎金，話中一個半字就有獎，有NT$100，星期四就開獎，可以上網睇，台幣$100/張彩票，結果買左兩張！

祝大家好運！

一年後先寫內容，威力彩結果有冇中呢？
緊係唔中啦！

08:45 回酒店執好行李攞到大堂keeo好，仲可以試下酒店早餐，蛋餅，味道OK。

聽聞康橋高雄站店早餐就座位多D大D，多D野吃！
呢度就冇咩野吃！我都唔知原來差咁遠！以為間間一樣！

冰豆漿，冰鮮奶

08:52 早餐是沒有手工豆花的

10:33 吃完早餐，就將行李搬上車，去稍遠少少近郊的岡山之眼，近年的人氣景點！

有冇覺得好似小、中、大提琴？鋼纜好似弦線！

10:38 唉！又落雨！仲幾大雨添！

原本以為要行樓梯上去，但有D團友姐姐腳唔方便，好彩可以行斜路上去，咁姐姐們就行得輕鬆D！

好似冇乜落雨，所以唔擔遮再影大合照

10:45 買崗山之眼門票，65歲長者免費，話可以唔計月份，所以我地有4個長者啦！要出示護照！

原本諗住唔收4個長者錢，長者就話除開大家share啦咁！

10:50 雖然天氣唔好，能見度低，睇唔到風景，但好彩上到去就停左雨

11:00 有一段地板係透明

崗山之眼入口處有小食店和洗手間

2格男廁，4格女廁

11:15 參觀完崗山之眼，坐接駁巴士返去原點，初時唔知邊一邊，所以影左張相send俾司機問佢應該搭邊架車？

有個團友姐姐就話好似係大莊公園，我話：「好似？呢D野唔好估估下好喎！都係等司機覆我啦！」

咁司機都好快覆我，叫我去「阿公店水庫」！

11:31 返到阿公店水庫啦！今次個司機就揸得好D，冇揸得咁快！

坐返自己包車返市區吃午餐啦！因為今日下午要搭飛機返香港，所以返咗市區先吃午餐穏陣啲！

12:16 台灣之旅最後一餐，我揀左劉家酸菜白肉(夢時代店)，因為上次東台灣之旅帶佢地吃這一鍋 (酸菜白肉鍋 & 養身麻辣鍋)，有團友話酸菜唔夠酸，我當時就話知道有一間酸啲好吃啲，如果有機會再帶佢哋嚟吃，今次機會黎啦！所以帶佢哋黎高雄就要試吓劉家酸菜白肉

12:19 其實之前吃過一次火鍋，又燒肉又大魚大肉，黎之前我都再下團友會唔會唔係好想打邊爐，佢哋都好猶豫，但一聽到我話呢餐係上次有團友話酸菜唔夠酸，所以刻意安排，佢哋就話一定要試吓咁話^^

原本崗山之眼附近都有劉家酸菜白肉分店，但考慮到途中可能塞車或者係估唔到前幾日嘅壞車情況，所以都係返市區吃穩陣啲，大家就忍耐下稍遲少少先吃午餐吧！

揀夢時代另一原因就係吃完仲可以行一陣！^^

12:20 記住呢個藍區出口，陣間旅遊巴係呢邊等我地

12:21 因為夢時代太大，所以問詢問處劉家酸菜白肉喺邊？原來喺綠區，去到綠區又再問7樓點去，因為帶住一大班人，都係問人好D，自己搵浪費時間又驚搵錯！

12:25 有個台灣人好熱心，話帶我地搭快速電梯，行一條捷徑，真係好快就到左！

劉家酸白菜火鍋 (夢時代百貨店) 訂了1pm
住址：高雄市前鎮區中華五路789號7樓（綠區）
電話：07-9760015
營業時間：星期一 至 星期四 11:00～22:00
星期五 11:00～22:30
星期六 10:30～22:30
星期日 10:30～22:00
http://www.lius.com.tw/

http://lily1101.pixnet.net/blog/post/67345405-【高雄食記】劉家酸菜白肉鍋%E2%80%A7夢時代%E2%80%A7眷村

之前我有吃過，所以知道份量都唔少，所以3人不大吃的話可選2人套餐便可

呢張枱外型好特別，就同酸菜白肉嗰火鍋煲一模一樣^^

覺得唔夠酸仲可以自己加酸汁

12:45 啱啱餐廳中間張枱外型係唔係好似呢個煲呢？

捲餅，叫左牛肉和蔬菜，都幾好味！尤其蔬菜好味！

豬耳有煙燻味，又切得薄，幾好吃！筍都OK好味！豆乾就麻麻地！

12:54 打卡送一碟豬肉片 (價值NT$140)

水餃皮太厚，麻麻地！

13:38 聽聞芝麻包好吃過紅豆鬆糕

4個人吃到超飽先NT$1080，等於港幣二佰幾蚊，每個人HK$70，打卡仲送豬肉片，抵到爛！

餐廳俾咗自成一角位置俾我地

大家都吃得好開心，話酸酸地好開胃，份量又多又平，之前吃咁多餐大魚大肉，而家咁樣好舒服^^

有團友竟然話呢餐係最好一餐! 咁就好啦！臨別台灣最後一餐有美好回憶！

13:50 我換咗衫嘅？^^
係呀！頭先喺夢時代NIKE，有團友知道我搵緊呢件衫一直冇我size，特登通知我話見到有我size，最後一件，即刻飛撲過去買！即著啦！

13:54 離開夢時代啦！上車去下一個點

14:07 下一個點又係商場

一來落雨天去室內比較好，二來大魯閣草衙道購物中心好近高雄機場，我哋坐19:20機返香港，預計5pm左右到機場，所以黎呢度咁又可以放心啲！

14:17 各位團友，又要認住呢個出口啦！陣間喺呢邊返上車

14:20 入到商場開始自由活動啦！

14:39 呢度其中一個賣點，係有迷你鈴鹿賽道，但平日要NT$5XX只能玩8分鐘，假期NT$7XX，貴了一點吧！

14:54 跟著黎春水堂買杯嘢飲先！

檸檬愛玉綠茶五分糖、微冰，但因為愛玉本身比較酸，就算5分糖飲落去都有啲酸，所以就返去問下可唔可以加返甜啲俾我，店員問我要8分甜定正常甜，咁我驚8分甜都係會酸，唔好再麻煩到人地，所以要正常甜啦！

店員好細心，話俾我試吓先，如果唔ok可以再加甜，ok左先再封杯口，我飲左啖都係覺得差少少，加多少少甜就ok！

店員再加左少少甜就直接封口^^，調整左甜度之後好飲好多！正！

15:03 呢個係Q版黑武士特別版，我有買普通版

15:17 團友又通知我話見到呢件Adidas有TAIPEI字，幾靚，我想買呢件呀！但冇我size，呢件係2XL，好大件！

呢件係大碼，我都太大件啦！

15:54 第二層就主要係兒童嘢！第三層係food court! 喺個度見到好多團友坐喺度休息，好似行到冇嘢行，我自己都差唔多行曬！所以就問下大家要唔要早半個鐘走，原本4:30pm先走，而家4pm走啦！去買生果啦！大家都同意！所以就通知司機黎接我地，早啲離開啦！

16:21 因為呢幾日團友都好想買生果，但都揾唔到，又冇經過，所以就問包車司機哥哥，去機場途中會唔會有生果店，結果司機哥哥就帶左我地黎呢間果子狸，大家都好開心！

切好嘅鳯梨4包NT$100

右邊好多愛文芒呀！左邊係金煌芒！

好大嘅西瓜呀！

大家都圍著買愛文芒！

16:24 金鑽鳯梨，竟然有團友姐姐問我啲鳯梨要擺幾耐先至熟，我話妳真係當我導遊呀！我點知！妳應該問店員吖嘛！^^ 佢仲要話就係要問我！嗰別團友真係當左我係無所不知嘅導遊！我心諗真導遊都未必知啦！有店員問店員吖嘛！😅

之後我有少少心得，鳳梨外皮變黃和散發出濃厚香味，應該就熟了！

16:46 好快就到達高雄機場

離別秋波，我都有去同司機哥哥傾下計，讚賞下佢嘅表現，話團友姐姐們都好滿意，所以大家夾左啲小費俾佢！

包車公司，有需要可以聯絡，之前第一次經歷唔好，一肚氣，今次第二次好好，所以派到好或唔好的司機就睇彩數啦！希望有改善左，以後次次都好啦！

16:51 包車司機哥哥完成左6日行程功成身退啦！唔該晒！辛苦晒！大家都好滿意呢位哥哥嘅表現，揸車又穏，會幫我地預計逗留時間，盡量餐廳門口接送，有時去餐廳會遲咗，仲會幫我地打俾餐廳講聲，有時又會開咪介紹下景點！今次幫公司挽回返唔少分數！

所以大家話要同小鮮肉司機哥哥影大合照！

其實包車公司應變反應都好快，上一次我哋為安全起見，由羅東搭火車到花蓮，包車就行蘇花公路，點知公路管制定點様塞車，以為成個成程亂晒，結果公司好快派另一架旅遊巴到花蓮火車站接我地，我哋就可以繼續行程。

今次公路上壞車，包車公司都好快派另一架旅遊巴接我地，抵讚！

16:53 其實都俾我預計時間早左啲到機場，早知係夢時代行多陣啦！冇諗過大魯閣草衙道購物中心嗰度冇乜嘢睇冇乜嘢行！

呢隻款都幾靚，但係又係冇我size

18:49 順利上機，冇delay

19:33 飛機餐係雞肉飯，冇乜特別！

21:03 返到香港機場等行李中

但等左45分鐘先攞到行李囉！個個都等到好唔耐煩！><

22:10 二十人南台灣6天之旅終於結束啦！相信我應該唔會再搞咁多人嘅旅行，不過呢兩次東、南台灣之旅，總算係特別嘅經歷體驗！團友們間唔時就會攞返出嚟講，值得回憶懷念！

返到屋企門口，發覺我的散錢包唔見咗，可以頭先係巴士上由褲袋跌咗出嚟，而我今次旅行，將大門匙取出放在散錢包內，所以大門匙也不見了，好彩屋企有人😓 又唔見咗嘢啦！每次都有啲嘢！

有團友嗰喼返到香港冇左個轆，團友當時喺機場即同航空公司報案，幾日後，航空公司賠返個全新喼俾佢！

11:23 另一位團友嗰喼爛成咁，可想而之嗰啲工作人員係點樣掟啲喼！但團友返到屋企先send俾我地睇，我話佢應該當時喺機場就要向航空公司報案，叫佢笠日不如試下打去問下有冇得賠，不過呢位團友話算喎！唔係咩靚喼！由佢啦！

麻麻地，味道好俗好cheap咁！冇乜效用！

好吃！好好吃！售價NT$46

一包入面有兩粒蛋，獨立包裝！

蛋白以至蛋黃都很入味，好香好吃！不要錯過！

劉家酸白菜火鍋 (夢時代百貨店) 訂了1pm
住址：高雄市前鎮區中華五路789號7樓（綠區）
電話：07-9760015
營業時間：星期一 至 星期四 11:00～22:00
星期五 11:00～22:30
星期六 10:30～22:30
星期日 10:30～22:00
http://www.lius.com.tw/
 

網友介紹：

【高雄食記】劉家酸白菜鍋‧夢時代‧眷村菜‧提供素食‧紅豆鬆糕好吃！