醜小鴨愛自遊

(Day 3-三朝皇家温泉旅館、鳥取、味暦あんべ、蟹飯、Aeon Mall Tottori Kita、驚安之典堂、炭火燒 jujuan、燒肉、東橫INN)

07:17 Day 3 早晨

今朝喺三朝溫泉旅館吃完早餐，原本想要由三朝溫泉坐0952上三德山投入堂，但天氣不佳，落雨，咁9點嗰陣就請前枱幫我地打電話去三德山問下係唔係封左山唔被上山，

答覆係唔建議上山，山上落得仲大雨喎！咁唯有取消行程

改左早d去鳥取，午餐吃季節限定蟹飯，希望之後幾日返米子天氣好，可以補返再去。

早上的溫泉旅館好多時都會有朝市

07:31 鯖魚ok、蕎頭一般、通粉沙律ok啦！正常！

07:41 可以整生雞蛋飯，但雞蛋冇蛋味，未試過蛋係冇味嘅，沙律什菜絲又麻麻地，沙津汁又麻麻地

最突出係呢碗小蜆湯，湯好鮮甜！好好飲！

07:50 一路吃早餐，外面一路落雨，都知道今日plan A要上三德山睇投入堂都冇乜行，所以決定行plan B, 陣間先去左鳥取，然後午餐排隊吃蟹飯，跟著去Aeon mall行下

08:10 對面房嘅房景，呢d大房可住多人

08:12 吃完早餐，休息一陣，就去浸溫泉啦！早晚男女湯會互換，所以今朝浸嘅係另一邊，黎到啱啱好又冇人，好似包左場咁！

09:22 今日嘅天氣預測><

吃完早餐，請職員再打去三德山睇下情況如何，但冇人聽，普通話女職員話其他同事覺得咁嘅天氣多數封山，臨離開三朝溫泉前，再次請職員打多次電話，睇下有無人聽，今次有人聽啦！但佢地話山上仲大雨過我地，叫我地唔好去啦！咁我都預左嘅，所以一於實行Plan B啦！過幾日再上三德山

10:22 早上10:15旅館有接駁車送去倉吉駅，但要事前預約，其實知道天氣會唔太好，琴晚已經預約左先！

呢架係尾班接駁車，只有呢班會去JR倉吉駅、白壁土藏群、二十世紀梨博物館三個地方

去到倉吉駅，補影返呢個巴士總站位置，坐去二十世紀梨博物館或三朝溫泉就係呢度坐啦！

10:23 有時間就係手信紀念品店周圍睇下試吃下

10:33 柯南列車嘅時刻表

10:33 好彩琴日黎嗰陣chop左，今日就壞左！

10:34 好奇怪的盆栽

10:36 往鳥取列車到達啦！

11:50 大約一小時車程就到達鳥取駅

大阪宜家有光饗宴，直到19年1月31日，可惜我2月中先去大阪，冇得睇><

原本應該一到埗就去觀光案內所索下料，不過要趕去吃蟹飯，驚要排好耐隊，甚至full左冇得吃，所以第一時間，先去揾間餐廳

11:58 鳥取都有得買潮服架！

11:59 呢間係鳥取市物產館，宜家趕時間，陣間吃完飯返轉頭再慢慢睇

12:02 前面就係蟹飯，快點跑去排隊先！

12:04 味暦あんべ (Tablelog 3.67)
0857-29-9125 予約可
鳥取県鳥取市弥生町175-2
JR 山陰本線 鳥取駅から徒歩約10分
昼　12:00～13:30
夜　18:00～22:00
休星日

到左唔知係同店員講定點？後來見到有兩人登記，先跟著登記！係呀！我日文名叫mario, 易叫易聽！^^

12:10 冇耐已經出現條隊

12:29 12點營業，之前已經入曬一批，我地要等第二批，其實如果第二批都入唔到應該都冇得吃，因為佢收13:30，午市只做個半鐘，晚市6pm繼續

12:39 終於都可以入座，因為排隊嗰陣已經落左order, 所以好快有得吃。

呢個係4500yen嘅「極」，蟹份量係2倍，初初好掙札緊究竟叫極定叫份量少d，因為自己唔係好大吃，怕吃唔曬浪費左，但諗到難得一次黎，以後未必再吃到，所以叫極，但又真係驚佢飯都係2倍

蟹飯一黎到真係好吸引，但都幾大碗咁！心諗死啦今次！點知筷子一篤，原來個底好淺，被佢錯覺嚇死左！

谷友冇介紹錯，真係好好好好好好吃！無論蟹肉鮮甜，加上蟹羔，一碗入面用盡一隻蟹，幾種吃法，聽谷友講，呢個飯係季節限定，11月-1月先有，真覺得好好彩今日可以吃到呢個飯，好感動！幸福呀！

有分4種份量，最少份量3500yen

12:53 呢碗湯都好好好飲，你見啦！好多料，所以好鮮甜，仲可以任飲，而每次都會俾返晒d料你，尤其舊蘿白超好吃，添飲佢會再俾返舊蘿白你！因為太飽，只能飲到兩碗，可惜！真係想飲多d！

12:56 哈哈！吃得曬！好好好味呀！以後吃唔返點算呀！><

13:00 個蟹湯好好好正！鮮、濃、甜！冇得輸！

13:07 吃飽飽啦！好好吃！好滿足！呢餐飯係今次鳥取米子之旅其中一個最深刻嘅食物！排行榜三甲內，坐亞望冠！

13:12 慢慢行返轉頭，見到有青提大福，入去睇下

好似好大粒，係唔係全部厚麵粉先咁大粒呀！150yen 買粒試下啦！

13:15 去返鳥取市物產館行下，呢個係天女之梨，外面係年輪蛋糕，入面係梨，唔係周圍可見到，估唔到係呢度都有得賣。

13:26 去JR鳥取駅嘅觀光案案所攞下料先

13:28 谷友話JR鳥取駅內呢間個抹茶蛋糕好吃，買一個做明早早餐啦！

意思指此商品要放係冰格，吃用前2小時攞出黎解凍

JR鳥取駅嘅商店

呢個蟹肉火車便當好吸引，好似好好吃咁！

13:31 仲有其他火車便當

13:32 秋意下的APA Hotel

離遠見到柯南列車

13:38 去 APA HOTEL check in左先，然後就去aeon mall行下

捉住秋天的尾巴

點解我冇買呢個><
連埋個碗架！

13:53 粒青提真係都幾大粒！不過都係唔夠上次係伊勢吃嘅鳯梨大福好吃！

14:41 往aeon mall 沿途經過好靚嘅海邊和鳥取柯南空港

Aeon mall對面係大型雜貨店

14:48 好啦！入aeon行下，呢間aeon mall好似好大，但其實冇咩嘢行冇咩嘢睇

一入去冇耐就見到遊戲玩具部，不過好細，好快睇完

可以俾你放一隻switch game卡嘅盒

14:55 跟著黎文具部，買左呢set可擦靚靚三眼仔原子筆

呢支三眼仔冇貨，其他迪士尼人物就有，例如米奇

15:06 咁都可以出㧪扙，咁又係，當年睇呢d卡通嘅，宜家年紀都唔細啦！配服日本人嘅創意諗頭

15:08 跟著黎到超市部

好大粒嘅藍莓

人地話揀士多啤梨要㨂三尖八角，葉向上堯先甜先好！

15:13 好想買呢盒試下，但冇理由咁早買跟著要一路拎著，都係行完最後臨走先返黎買，希望冇俾人買晒啦！

仲有菠蘿、蜜瓜、什果

靑提、巨峰

15:23 呢支梨水幾好飲，真係有梨味，味道幾真

上層服務部d衫好old school, 完全冇興趣睇

15:32 Aeon mall另一邊

仲有夾公仔

16:05 鳥取starbucks出左個限定hand made杯, 每一隻都有d唔同，以鳥取砂丘為主題，好靚呀！真係有衝動想買一隻，呢隻咁大隻當然只係for display！

跟著行下aeon mall附近，abc-mart好細間，冇咩嘢睇

16:10 鳥取今日天氣算係咁，又冇話成日落雨，不過係鳥取真係唔知做乜，明天天氣好d，先去砂丘，所以今日只好黎aeon mall行下，不過真係冇咩好行！

16:18 返去aeon mall嗰陣就見到彩虹啦！

16:35 時間都唔早，所以去左一開始落車對面嘅大型雜貨店行下

17:48 之後由aeon mall坐返巴士返鳥取駅，千祈唔好miss班車，一個鐘一班車架！

17:49 谷友話呢個抹茶蛋糕好吃，所以黎鳥取駅買返酒店，今晚吃一半，另一半明早做早餐

18:10 APA HOTEL嘅廁所都係一般組合式，不過鳥取房間空間比其他地區分店大

18:19 但APA嘅枕頭係前所未有見過咁薄，點訓呀？！唯有落去問下有冇厚d硬d嘅！叫佢放係我地房，因為我地要出街啦！

好彩都有厚d但係偏軟，都好過冇啦！(但冇影到相)

18:40 因為預約左8:30pm先吃晚飯，所以仲有時間可以去驚安之殿堂行下，通常24hr或營業到凌晨！

驚安之典安好似一間大型雜貨店，乜都有，零食、藥品、化妝品、家電、玩具、服裝、成人用品、咩古怪野都有，所以都幾鍾意行！

價格未必係最平，但都唔係貴，可以話係合理，有時仲有額外discount

18:46 我都幾鍾意係驚安買底底，因為都幾平，好似呢一setCK三條平腳底底3990yen, 差唔多HK$280, 香港買唔到！

但要留意，平腳原來有分長平腳和短平腳，我想要的係短平腳，差點攞錯

掛勾磁貼

19:06 真係有效嘅明治骨膠原粉，有咩好處之前講過啦！想知詳情，網上google下「明治骨膠原粉 關節」啦！

19:17 呢個4件980yen, 揀左3款鱈魚芝士條，除左杏仁個隻麻麻，明太子和原味都好吃！最後一包揀左下面右邊魷魚，好硬，雖然附好沙拉醬俾你點黎吃，但用焗爐烤熱少少都係硬，所以唔會再買呢款

19:47 行完驚安之殿堂，買完嘢就先返酒店放底d嘢，然後去吃晚餐啦！

20:24 晚餐訂左8:30PM

炭火燒jujuan 3.41 1700-2400 (L.O.2300)
0857-21-1919
〒680-0833鳥取県鳥取市末広温泉町751
ＪＲ線・鳥取駅徒歩5分
http://sumibi-jujuan.info/

20:27 預先定左右上邊呢個宴會set, 要3人以上先可預定，每人3800yen, 我見咩都有d又平，所以就訂呢個

以為bottle beer係細支，所以叫左杯medium beer 550yen

炭火燒果然真係用炭火燒

20:32 Medium beer就咁既size, 但原來bottle beer 係一大支，早知叫呢個啦！650yen！好羨慕人地飲><

20:34 頭盤係火腿配洋蔥

燒蟹羔味噌

魷魚、帆立貝、蜆

20:36 一開始服務員會幫我地燒蟹蓋同魷魚，話魷魚可以點熟左嘅蟹羔吃

20:38 都幾好味，魷魚點蟹羔味噌不錯吃

20:42 魷魚點唔點蟹味噌都好味，大蜆都唔錯，燒完都幾嫰，反而帆立貝就一般

20:57 有朋友以為塊牛肉未切，其實已經切開左幾塊

雞唔錯，唔知係唔係大山雞！好吃！可惜分量少左d！

20:58 調味左嘅牛肉反而一般啦！

20:59 d牛肉都唔差得過強小亭，所以呢個餐都算得上係抵吃，日本openrice 「tablelog」都有3.41分架！

21:10 後來發覺牛肉加上少少鹽，少少胡椒，仲好吃！^^

d雞因為俾d牛肉搶火，所以成日令到d雞黑曬！而且因為怕唔熟，所以燒耐少少，結果有少少鞋，不過都不錯吃，雖然雞係冇調味，但吃到好香的雞味！

21:28 不嬲都覺得蔬菜唔係好適合用黎燒！可能係我技術唔好，總之覺得呢d燒出黎麻麻！

22:39 之後去左aeon mall行下，啤酒禮盒真係好少見

22:47 有個朋友想黎麥當勞買呢個盒，aeon mall 入面就有一間麥當勞，但要23/11先開始發售

22:48 日本麥當勞呢個黑朱古力批幾好吃喎！

23:38 返到酒店，吃一半呢個抹茶蛋糕，留一半明早做早餐

23:43 呢個天女之梨都係明早的早餐

23:49 返黎嗰陣喺便利店買左黑松露雪糕，但冇咩黑松露味，麻麻地

我今次士多啤梨揀得好好味呀！好甜！

23:53 呢個抹茶蛋糕真係幾好吃！果然係得獎蛋糕

APA HOTEL都算靜，唔知係隔音好？旁邊冇乜住客？定住客都好安靜！但床被就好厚好熱！熄左暖氣都熱到high high!

味暦あんべ (Tablelog 3.67) 蟹飯
0857-29-9125 予約可
鳥取県鳥取市弥生町175-2
JR 山陰本線 鳥取駅から徒歩約10分
昼　12:00～13:30
夜　18:00～22:00
休星日

炭火燒jujuan (Tablelog 3.41)

1700-2400 (L.O.2300)
0857-21-1919
〒680-0833鳥取県鳥取市末広温泉町751
ＪＲ線・鳥取駅徒歩5分
http://sumibi-jujuan.info/