醜小鴨愛自遊

(Day 1-米子鬼太郎空港、AEON Mall 超市、強小亭 (米之蓮大山黑牛燒肉)、米子東橫Inn)

 

08:51 今次去米子鳥取，其實想去好耐，今日終於起行。

今朝7點起身，冇吃早餐，只吃條蕉，啱啱好搭到8點嘅巴士！因為早餐去機場Lounge先吃。

 

09:04 就算網上check in左，香港航空都幾多人排隊托運行李喎！

 

09:25 出境啦！

 

09:37 香港機場有賣ROYCE, 但價錢同出面差唔多，貴過日本一倍價錢！

 

09:48 用信用卡免費換本雜誌先^^

 

09:58 跟著就去lounge, 照舊都係有好多人，排隊攞野期間，有個冇水準嘅疑似香港男人打尖，同佢講要排隊，佢竟然話有排，

跟著我後面d人出聲，我聽唔清楚，以為佢地識得，只係我夾得慢，所以佢就打我尖，之後先知，原來佢地互不相識><

唔知係唔係人多，今次d魚蛋粉好少魚蛋，當然要飲返杯Asahi !

 

10:35 登機時間係10:15，其實我差唔多10:30先去到閘口，所以係閘口求其影幾張相就登機！

 

10:51 架機其實係細機，左邊三座位，右邊三座位，感覺有d舊，仲舊過HK Express，我只不過遲15分鐘網上check in，已經要坐到好後

 

11:50 可能因為細機關係，所以起飛都有d顛頗，係飛機上做左一陣公司野已經好攰！

 

12:32 飛機餐都ok好吃，有蕎麥麵、山水豆腐花、豬扒飯或雞意粉，後者都幾好味

12:35 飲品有嘉士伯or青島，係成罐俾你嘅！我不嬲唔鍾意飲嘉士伯，覺得佢苦，所以我揀咗青島，

但今次飲覺得麻麻地，唔夠Asahi 或 麒麟啤，所以以後唔會飲青島啦！

 

15:59 到達米子鬼太郎機場，但開始落雨啦！有少少濕但未需要擔遮，機場細到一落機就差唔多就要排隊辦理入境！

 

16:33 到去攞行李，行李已經出左黎，排好曬等緊我，但每次日本入境前都要再經check一輪背囊，人要過機，驚你帶違禁品，搞左一輪先俾入境！

 

16:39 米子鬼太郎機場唔大，但鬼太郎都無處不在，因為都知趕唔到4點幾JR班車，所以輕鬆行下機場，同鬼太郎影下相，

去觀光案內所換 JR山陰＆岡山地區鐵路周遊券 4 days pass, 之前係香港買左，但佢話機場冇得換，要去米子駅先有得換，

咁問佢chop機場印章 (國內線接機大堂側的綜合服務處設有紀念印章) ，又話壞左，唯有8日之後返黎睇下整好未啦！

16:46 件鬼太郎外套就掛係旁邊，可以借黎影相呃like

16:55 係機場影下商店有咩買，最後嗰日先黎機場買，唔使咁早就買左。

16:55 呢隻都ok好味，有d地方有得試吃

呢個朱古力話攞曬獎咁，都ok好味，入面左梨汁

 

16:56 回程時會買一個眼球爸爸磁貼

17:00 Asahi隔離罐二十世紀梨啤酒好飲喎！之後都飲左兩次！^^

 

17:02 最緊要係要吃機場嘅梨軟雪糕，真係好吃！之後吃過幾間都冇呢間好吃，好有梨味！

今次叫左大山牛乳和二十世紀梨味兩溝，牛奶就一般牛奶味咁，但梨味反而比較特出和特別，回港時再黎吃一杯淨梨味！

17:08 又見到鬼太郎機長忍唔住又影幾張^^

17:11 由米子空港行去JR駅都要十分鐘左右，駅內冇職員，得一部自動售票機，只能逐張逐張買，不能一次買多張，到米子駅240yen/人。

17:38 等左十分鐘左右，黎左黃色包租婆列車，大家都衝上車揾位坐，大家都有位坐，連梳化天花都有公仔圖案，第二卡就係眼球爸爸主題車卡。

 

 

 

 

18:13 一共有6款車廂圖案

 

18:14 竟然有0號月台

 

18:16 車程大約半小時就到達JR米子駅，先去綠色窗口兌換 JR山陰＆岡山地區鐵路周遊券 4 Days pass (4500日圓),

持有此PASS的人才能買的「暢遊漫畫王國鳥取周遊券」(1000日圓) 包六個景點入場卷，

原來係要去任何其中一個景點購買，必須持有4 days pass先可加購。

但原來米子空港都可以買「暢遊漫畫王國鳥取周遊券」，只不過係空港既然唔可以兌換4 days pass, 咁都費事問！唯有明天去第一個景點先再加購。

 

18:22 米子駅菓子之壽城商店，咁就唔使真係去菓子之壽城先買到手信，雖然嗰度大d多d野買，但交通好唔方便

 

綠色窗口外面有印章可蓋，仲可以蓋在postcard上，但有d人一攞攞幾張，有d就十幾張，已經攞曬！我唯有去問職員仲有冇，好彩，佢又拎一曡出黎^^

 

18:32 好啦！大家chop好曬印，又兌換曬 JR山陰＆岡山地區鐵路周遊券 4 days pass，就去東橫inn check in

 

18:38 東橫inn價錢真係幾平，房間大細約15平方米，唔算特別細，因為我住過仲細d，dormy inn都只不過係15平方米左右，

裝修都算乾淨企理，仲包早餐，雖然唔好預早餐會有好多野吃，但有時趕時間又或者早起都不失係好選擇！

 

 

18:55 但今次酒店安排左14樓最高嗰層，但𨋢口隔離嘅房俾我，好彩出入既人唔算好多，唔算好嘈，隔音有d差，隔離一班女仔大笑都聽到，不過悄後都冇笑得咁大聲啦！

房間係望JR米子駅，都算係好開揚架啦！床下底可以放行李喼！

 

19:11 跟著就去AEON超市，因為book左8:30pm先吃晚餐，可以行下街先

 

米子AEON超市 イオン米子駅前店

地址：鳥取県米子市末広町311番地

電話：0859-22-2121
營業時間：8:00～22:00
消費方式：可刷卡，有退稅服務
交通停車：專屬停車
官網FB粉絲團：http://shop.aeon.jp/store/01/0142730/

 

19:13 一行入去就有donut店售買緊比卡超限定donut, 好似每日限定300個，外型好靚好可愛，

我唔係比卡超迷都要買個黎吃下，都ok好味，我買完冇耐係門口影幾張相就賣曬！

19:23 樓上嗰幾層就冇乜嘢睇，有DASIO一佰蚊店，冇咩嘢睇，有藥房但冇乜嘢買，有一個手信店可以買下d手信，

買左一罐梨汁 (圖中鐵罐)，話有60%梨汁，好難飲，好似d藥水，好假！認住佢，唔好買！

 

呢個用鳥取砂丘d砂黎整嘅擺設，周圍都見到，臨返香港時買左個眼球爸爸

 

亦係旅程中途買左個眼球爸爸磁貼

 

其實好想買呢個牙簽座，好可愛！雖然實際唔會點用牙簽，但想就咁放係度，但都被人阻止左><

 

19:24 好似好出名嘅蟹肉燒賣，最後都係冇買

19:31 Aeon超市

19:34 最後係超市買左個王秋梨返酒店吃！

 

19:43 呢隻鹽味荔枝汁都幾好飲

 

千祈唔好買左邊罐梨汁，話有60%梨汁，好難飲，好似d藥水，好假！認住佢，唔好買！

 

20:00

 

20:25 決定好咁做，就行去強小亭，初初都冇諗住吃呢間，因為好多餐都吃牛，但網上好多人話黎米子必吃，所以就一早訂左8:30PM吃呢間

 

20:29 一路上又黑又少街燈又有少少凍又好似好遙遠咁，大約行左十幾分鐘，終於搵到強小亭，終於到我黎吃強小亭啦！

 

焼肉強小亭 米之蓮 (tablelog: 3.56) 

050-5594-1058

営業時間: 17:00～23:00（Lo22:00）

〒683-0812 米子市角盤町1-60-11

由米子駅徒步約15分鐘

星期日休息

http://www.kyoshotei.com/

20:31 佢安排左卡位俾我地^^侍應即時攞個menu俾我睇，問我係唔係pre-order左6800yen (大山黑牛) 和8500yen set (強小亭set), 最高個set要萬幾yen, 又未吃過，都係唔好叫咁貴啦！

有時套餐會SOLD OUT，所以最好訂位時Pre-Order埋個套餐，如果黎都冇得食都幾遺憾！

20:36 跟著俾個drink list我睇，我叫左杯suntroy premium啤酒!

係米子第一晚吃強小亭，飲杯^^

20:44 開頭就黎左和牛刺身壽司，一份係平d嘅，另一份強小亭set就有海膽係上面，先試一半普通嘅，

一放入口好味到震，唔知點解有d炭烤定煙𤑛味，d用雖然係生，但完全唔覺得佢係生，又唔會好肥，又有d汁，

跟著就吃海膽版，當然都好吃，但就算冇海膽我都已經覺得好好吃，好感動可以吃到咁好味嘅牛肉！

 

20:51 第二樣就係要自己燒嘅燒肉，可以點汁嘅，兩個set各有兩塊，唔洗燒太熟，呢個都係好好吃呀！

 

21:00 第三樣都係要自己燒，普通set得一塊，強小亭set就有兩塊，呢個跟一碗蛋白泡泡入面有隻生蛋黃，

原來係要搞均佢當汁點，呢個超好吃，普通set嘅牛加上蛋黃泡泡汁都已經好好吃，強小亭set嘅牛肉仲好吃！

好感動，多謝你竟然可以將牛肉昇華到如此地步，係我吃過最好吃嘅牛肉！

21:07 跟著黎左一塊蘆薈咁嘅葉，佢話係清口腔嘅！

 

21:13 稍後就黎稀少部位和牛拼盤啦！

 

跟著就黎左一大盤沙律，但驚吃完咁大盤沙律頂住個胃，所以就決定吃左稀少部位和牛先啦！

 

影相都影左一大輪，我地先試6800yen嗰set嘅和牛先，但因為唔識睇日文係唔知咩部位架！咁就由瘦吃到肥啦！

呢個set啲和牛都幾好吃，就算吃到最肥，其實都唔算係好肥，因為呢d稀少部位和牛冇調味，所以我地又試下點d醬或者海鹽，

我覺得加d蘿蔔蓉再加d燒汁係最好嘅配搭，就最好吃啦！

平嘅肉就3個部位，每種兩塊，但啲牛肉其實係幾好嘅；強小亭set就4個部位，每種兩塊，呢個set啲稀有部位我反而覺得冇咁好吃，

因為當中有一款部位有d筋，另外有一個部位亦係最肥部位，對我黎講就太肥，我其實好怕好肥嘅！

但如果你鍾意嗰啲所謂入口即溶，即係成舊肥羔放入口就另當別論！當然亦都會有人鍾意

 

21:14 但我嘅結論係6800yen嘅呢個大山黑牛set，可以講得話係抵吃好多既！不過口味好個人嘅！

 

21:39 最後就黎左炒飯和牛肉湯，牛湯ok啦！有d胡椒味，但又冇咩話好特別，但原來飯可以揀牛肉飯或咖哩飯，

係隔離枱啲香港人講我聽到先知！佢地話咖哩飯好吃過炒飯！係呀！真係成間都係香港人！^^

我懷疑佢將香港人全部安排係地下，日本人就坐樓上，隔開我地！

其實我一直都以為只有牛肉炒飯，所以待應問我係唔係要飯已經點曬頭，如果唔係，我地有兩個set, 我會一個叫牛肉炒飯，一個叫口咖哩飯試下

 

21:54 咖啡一般，味道好淡

 

21:58 6500yen的有個雪糕，同樣都有梨和柿，但雪糕太甜，吃唔出係咩味嘅雪糕，有點果仁係入面，平set嘅雪糕麻麻地！

 

甜品好靚，8500yen的有三樣嘢，分別係牛奶布丁、蛋黃布丁和抹茶蛋糕加少少紅豆，仲有三塊梨和柿，柿就爽爽脆脆，又冇咩話好特別

 

行返酒店途中好凍，好彩我有帶住uniqlo薄長袖羽絨，頂到下！但沿途都好黑，冇乜街燈，我要開住手機燈行！

 

23:09 返到房執下行李，陣間過12點要攞個喼去JR駅locker寄存，宜家切個王秋梨黎吃，冇乜特別！

 

23:56 點知發現今日整花左部新相機><

 

00:28 執好行李，就攞落去JR米子駅LOCKER寄存，暫時全部LOCKER都係吉，究竟明早有幾多人用左大LOCKER呢？

如果過左3日都唔黎攞行李，可能就要到呢個米子營業所先可以攞得返行李啦！

 

Locker位置嘅燈係環保燈，行埋去先會亮

 

00:38 Welcome to蟹取縣

 

00:49 返到黎東橫inn, 再問多次第二個人可唔可以寄存行李係酒店幾日，我過幾日返黎住再攞，佢都係話唔得，只可當日寄存，

咁我問可唔可以俾錢，佢好認真咁計同埋答我，可以呀！book一間房黎俾個行李住，最平每日都要5700yen😓，

佢諗左好耐，終於諗到個好方法，「你又可以放行李，我地又可以租出房間賺錢，一舉兩得！」我當然冇咁傻啦！所以都係決定放係米子駅隔離嘅locker!

 

【住宿】 東橫INN行李寄放問題

https://www.backpackers.com.tw/forum/showthread.php?t=1234252

 

01:11 今次在日本用的上網卡

明天要一早起身去由良柯南駅啦！

 

 

焼肉強小亭 米之蓮 (tablelog: 3.56) 

050-5594-1058

営業時間: 17:00～23:00（Lo22:00）

〒683-0812 米子市角盤町1-60-11

由米子駅徒步約15分鐘

星期日休息

http://www.kyoshotei.com/