醜小鴨愛自遊

(Day 1-台北桃園機場、雪山隧道、宜蘭酒廠、晶英酒店紅樓櫻桃鴨、雙園、諾貝爾、奕順軒、羅東夜市、安禾時尚旅館)

 

09:04 今朝原本係10:20幾，咁我6點起身啦！一睇whatsapp, 原來已經有團友得知啱啱國泰通知航班delay至11:30am，航空公司只係早幾分鐘send嚟！

所以問係唔係照常8:15am機場集合，咁我就話順延9:15am先集合啦！有人去到巴士站又要返屋企，但有幾個團友就一早到左機場等

 

09:23 籌備左半年，係半年前已經買左機票然後訂酒店，跟著開始計劃呢個16人嘅東台灣釋迦之旅包車行程，呢件咁艱巨嘅工程，我一個人當然搞唔掂，好彩多得另外兩位同事出力幫手，先能夠完成！

當中好多細微野要顧及，好彩今次16人嘅意見唔多，好聽我地安排，又唔會有人話呢樣唔吃個樣唔吃，又唔會話貴，樣樣要平，當然我地唔會揀貴野，最緊要合理和大眾化為主！

 

09:35 大家都幾準時，9:15am集合

 

09:38 點解會叫釋迦之旅，因為呢個係今次行程嘅重點，原來我地16人當中，有d人未吃過釋迦（俗稱番鬼荔枝），

又或者大家都比較少食，而台東盛產釋迦，台灣d釋迦出名又大又靚，所以今次要帶佢地去吃和買返香港啦！

好啦！究竟籌備咁耐嘅行程會係點呢？

 

09:46 出左境就大家分頭行事，想吃早餐去吃早餐，我地就要去Lounge吃早餐，所以約左係登機度等，到時再影合照。

咁我就先去行下Disney Store

 

 

09:50 跟著我去左Lounge吃早餐

Lounge嘅魚蛋好吃，粉就麻麻，雖然可以要淨魚蛋，不過要飽肚都係要魚蛋粉啦！

 

Lounge嘅另一邊，好舒服咁喎！

 

除左果汁、奶茶、即磨咖啡，竟然有嘉士伯和Asahi, 咁緊係要返杯Asahi啤啤佢啦！我覺得Asahi幾好飲^^

 

10:11

 

魚蛋粉嘅魚蛋正！沙津正！啤酒正！腸粉唔得！

 

10:50 跟著行去登機啦！呢邊竟然都仲有間Disney Store

 

10:52 大家又再次集合影相，大家都好開心興奮^^

 

10:57 我都好開心能夠參與今次16人之旅，我從來未試過同咁多識嘅人一齊去旅行！^^

 

11:02 今次係坐國泰，半年前做二人行價，平均一人連稅HK$1232, 咁大家可以坐得舒服d啦！

 

11:18 排隊登機啦！11:30起飛！

 

11:28 排隊登機啦！11:30起飛！

 

12:20 當初大家一路擔心機上冇野食，可能得派面麵包，落機又唔係即刻吃野會餓親，宜家唔使擔心啦！有焗豬扒飯！

 

12:25 係飛機上睇返2007年will smith個套The Legend 我是傳奇, 片中有一幕廣告就有 Batman VS Superman,

當時大家都好期待希望真係有，結果舊年2017年足足十年後終於真係上映左！

 

12:51 今日天氣好好！

 

13:21 到達台灣上空

 

13:26 到達台北桃園機場

 

13:36 新客運大樓，新係幾新，不過好似細左d

 

未出境已經可以買電話卡上網卡，為左節省時間，大家嘅上網卡已經在香港買左！

 

仲可以換錢，不過當時櫃臺兌匯率就3.7，海外櫃元機提款就3.8

 

13:40 宜家新客運大樓出境需時，好彩都唔算等得好耐！排左10分鐘左右！

 

13:59 等行李啦！

 

14:12 因為我約左個台灣朋友交收公仔，兩年前佢叫我係香港幫佢買，話去香港再攞，結果擺左兩年，今次我都難得黎台北 (近年去日本比較多^^），

就問佢方唔方便黎機場攞，因為兩盒都好大盒下，我今日就會去宜蘭，跟著花蓮，台東，最後先返台北，一路攞住兩個野都唔係咁方便，朋友都好爽快答應黎機場攞！thx !

同朋友傾左一陣之後，約定過幾日我返台北再約吃個飯聚下！

 

14:23 團友都係度排櫃員機提款，咁大個機場得一部櫃員機，排到儍！

 

14:51 初初唔知我地架旅遊巴停係邊，都揾左陣問左陣先搵到！

雖然有包車，但因為安全理由，我地聽朝選擇自行坐火車到花蓮再上旅遊車，團體火車票當然要一早網上購買，但預售火車票有好多規限，好麻煩，

好彩旅遊車公司主動提出幫我地訂，真好！幫了很大忙！不過講到例曬題！

咁因為明早要自行坐火車，為免團友唔洗咁辛苦又要推行李上落火車，我建議行李可前一晚跟車（即今晚），然後準備一袋今晚要用的用品和明天要著的衫，

呢個要係香港就準備定，黎到台灣就冇時間俾你執喼！

個個團友都好乖，一早準備好曬，宜家由喼攞左出黎就得，今晚一攞袋野就上得酒店！

 

呢架係坐24人，雖然我地得16人，但我堅持要大小小，坐得舒服之餘，如果行李唔夠放，都可放在椅子上！

旅遊巴比我想像中大，比睇相感覺更好！各團友都好滿意，呢4日都坐呢架車，所以舒適度好重要，呢架車真係幾滿意^^

 

仲有電視睇，一般都係播新聞，但訊號接收唔係咁好！另外仲有咪，可以好似導遊咁猛咁講野！不過我就適當地介紹下跟著嘅行程和注意事項!

 

15:27 經過台北圓山大飯店

 

遠望101

 

15:52 司機係中途站擺低我地去下廁所，入面都有d商品買！

之前係台北天氣仲好好，但越接近宜蘭就越差

 

經過雪山隧道只需9分幾鐘時間，如果以前冇雪山隧道就可能需要一小時車程先可以到宜蘭啦！

 

16:28 宜蘭車站，一到宜蘭就落雨><
不過一早都search過呢幾日天氣都麻麻

 

16:37 宜蘭酒廠收5點，時間唔多啦！得返半個鐘！要行快d睇快d啦！

 

16:46 三星蔥都有得賣

16：50 有d團友見到呢個花雕雞麵(即食麵) 好興奮，話好吃，結果一到埗第一個點就買左4箱花雕雞麵，

一箱有 4pack, 每 pack 3包，即一共12包，每包又附湯包和雞粒等！我都食過，係ok 好味嘅！

 

17:38

 

17:40 係香港已經一早訂左5pm兩圍8人餐嘅櫻桃鴨，結果坐低已經差不多5:45！

待應問我地要咩茶，有3種茶，叫套餐就包是但兩種，唔係套餐就要計錢，咁我地叫左兩款茶試下

 

咁早但都差唔多坐滿

 

17:44 之前睇8人餐就NT$7999，宜家加左小小價，要NT$8500, 除左一鴨五吃，仲有其他菜可幾選一或選二

 

17:57 估唔到原來有兩隻，可能4人已經有一隻，所以8人就有兩隻，兩隻鴨一出場，燒得好飽滿好靚，大家都爭住影相

 

17:59 第一道上枱係鴨肉握壽司，係有卓頭，係幾靚，鴨皮好脆，塊鴨肉係好吃嘅，但可能肉切得比較少！得d皮，所以覺得味道一般！

 

18:02 紅樓小滿漢，有8碟，有花枝、露旬、馬蹄、海哲、蕃茄、勲蹄、黃瓜和好似係牛碾....

 

18:03 呢個menu冇，唔知係咩，唔通係都係小滿漢？

 

18:04 一鴨五吃之第二道，香滷鴨小拼？

 

18:07 我諗呢個係時令海鮮，鮑魚好吃，個汁好正！柚子檸檬汁，呢個大家都鍾意！

 

18:07 呢個係鴨翼，都幾好味，其實有好多餸出黎，都唔知係邊様，總之好多餸

 

宜家先食到一半咋！

但係佢上菜速度實在太快，衝烽車咁！影得相黎就第二碟，吃都吃唔切，根本冇時間欣賞菜色！所以我同佢講可唔可以稍為上得慢少少，

但佢話呢d係冷盤，但已經上到成枱都係，係唔係可以慢少少呢！

提一提送每人一杯柳丁汁（即係橙汁），好飲呀！唔想飲橙汁可以轉飲汽水或啤酒，可揀麒麟啤，限一人一罐

另外仲有梅子醋，呢個佢會一路re-fill㗎！正呀！

 

18:11 一鴨五吃之第三道-片皮鴨捲三星蔥餅
呢個好期待三星蔥嘅香，不過又係冇乜特別！有點失望！

另外仲整左一碟鴨肉，真係吃唔落啦！

 

18:23 跟著黎一條晶品海上鮮，都好大條下！

 

18:31 再黎兩碟菜，包括雜菜和水蓮，後者香港比較少食到，爽爽地咁，都幾好吃

 

18:34 油爆鮮蝦，都好大隻下

 

18:36 一鴨五吃第四道-三杯鴨骨

 

18:39 因為有兩隻鴨所以另一隻做左生菜包鴨絲

真係太多餸！好飽好飽啦！

 

18:40 一鴨五吃第五道-慢火白菜煲鴨湯

呢個好好飲，好濃味！飲左幾碗！

 

18:47 你又點估到KO左一大煲湯，佢話因為有兩隻鴨所以有兩煲湯，我地想係度飲定係打包拎走，我地拎走點會仲飲，所以叫佢上埋

台灣人乜都咁大吃嘅咩？呢個餐可能夠10-12人吃！

 

18:51 吃到七點左右，人客漸少，台灣人果然係早吃！我都話香港人在外地唔好出醜！有待應走過黎同我地講說話細聲d，唉！瘀左！

 

呢一餐飯真係好豐富，係我地其中一個團友嗰女極力推介，到台灣第一餐已經包到頂唔住！

 

19:05 另一圍明顯食量比較細，兩煲湯都只係飲左一半，拍照做證據！^^

 

19:05 我地呢圍既湯基本上飲曬，不過d肉吃唔到啦！好好好飽！

 

19:08 食到咁飽去下廁所放下水先！

 

19:11 行一陣消化下

 

19:14 返去餐廳內，原來仲有甜品，我地呢圍揀左八寶甜芋泥，另一圍就揀紫米紅豆蓮子露，覺得我地識揀呢！

呢個芋泥真係好吃，唔會過甜，吃到咁飽都覺得好吃，好吃當然要同另一圍開心share啦！其實我地呢邊都冇可能吃得曬！太飽 ^^

 

19:21 埋單兩圍合共NT$18700, 平均每人NT$1168，當時3.8匯率，即HK$307, 呢個價錢真係幾抵食，食到好飽好飽，每圍多兩個食都得！

 

20:13 返酒店啦！因為之前為左明早要自行推行李搭火車，所以搵嘅酒店都近火車站，宜家諗到行李前一晚可跟車走就輕鬆好多啦！

第一晚住安禾時尚旅館 (Anho Hotel)
睇外表真係好似時鐘酒店咁！^^

 

呢個係敎你點去早餐區嘅地圖

 

20:19 攞8間房！

 

20:23 團友都覺得房間都幾大和乾淨，雖然話房間只得15平方米，但相信應該唔止15平方米。

d燈光會一路變色，真係有點時鐘酒店咁俗氣，不過可以熄左佢！

客房(兩床)-無窗 (Twin No Window)
15 平方米
已包括費用： 早餐
HK$523/晚

但間房夜晚訓覺個陣間唔中有d電機房聲，都訓到嘅，唔知係呢間房先有定點呢！

 

個雪櫃會發出怪聲，所以夜晚返黎熄左佢

 

好啦！求其影下要快d出去集合，去鳩烏啦！

 

廁所都好大下，但花灑水力唔係好夠！

 

有牙膏牙刷提供

 

20:25 點解221號房係3F, 好易令人混亂

 

20:41 係Lobby集合然後去買野，櫃檯服務員個位小妺妹幫我地影相個陣好生鬼呀！真可愛！^^

 

20:54 行去買肉鬆、諾貝爾、奕順軒買野

 

21:01 之前阿媽買過返黎吃過，紫菜肉鬆都幾好吃，我自己就買左兩包，每包NT$100

佢地仲有買其他野！

 

21:05 雙園對面就有水果店，有點衝動想買d生果返酒店吃，不過都係冇買！

 

跟著去諾貝爾，要經過夜市

 

21:14 見到有得飲蜂蜜苦瓜汁，大家買黎飲下先，有d團友就買一杯share飲，呢間嘅蜂蜜苦瓜汁有渣嘅，

我個人就麻麻鍾意有渣，不過其他團友又OK覺得好飲

 

21:21 呢間鬍鬚張肉澡飯都幾出名

 

 

21:28 團友想買奶凍，但保存期好短得七日，今日先第一日，所以唔買住，可能過幾日返黎再買

 

21:39 我主要買三星蔥蛋捲

21:46 原來呢間奕順軒收10:30pm

 

團友要搵牙簽，話台灣牙簽正！好用喎！不過呢間超市冇！

21:56 洛梨即係牛油果，好大粒呀！

 

 

22:05 炭烤甘庶？！

 

22:08 最後就去羅東夜市行下啦

 

當歸羊肉好香

 

22:13 一齊去吃晶圓紅麴粉圓

 

初時唔識點叫，個女店員就唔係好老脾，可能覺得我地蠢啦！^^

原來先點左手邊嘅粉圓，因為粉圓比較甜，所以會配埋右手邊嘅8種冰，基本上價錢睇左邊就得，右邊免費！

 

22:23 我叫左原創包心粉圓，另兩個團友就叫紅麴包心粉圓，大家share吃，每款NT$60, 我覺得紅麴好味d，

原創冇乜特別！得個甜！d冰原來係牛奶冰！好吃，仙草都好吃！

邊個咁多手！

整兩隻眼出黎！

 

另外個邊團友叫左個晶圓開運五行包心粉圓share食

22:31 吃完粉圓，一部份團友就先返酒店休息啦！我地繼續搵野吃

 

22:35 羅東夜市又見到有得買水果，好想買d水果返去酒店吃，不過團友們都冇乜人買，令到我衝動大減

 

22:38 揾左一陣，終於揾到七巧味三星蔥餅，呢間好似好出名，不過已經收左檔><

 

22:44 唯有揾另一間三星蔥餅吃，黎到宜蘭，緊係要試下三星蔥餅，不過羅東夜市偏早收檔，大約10:30pm已經陸續收檔

得返呢間有得食

 

22:52 叫老板幫我地切開幾份，老板都好nice好樂意

 

加左d胡椒粉，都有d香，不過其實三星蔥香味唔夠，味道ok啦！不過我相信有更好吃既！我諗七巧味三星蔥餅應該好味d卦！

 

23:05 行返旅館啦！

 

22:30 明早的早餐卷

 

我卒之都係買左一小盒芭樂返黎吃